琴晚發現阿斗忽然四肢無力，又唔食又唔跳又唔跑，仲跛左一隻腳。原本Book左今日打預防針，去到東涌獸醫度，佢話阿斗無骨折，但係唔知點解會咁，有可能係甩左骹，建議超x-ray，同埋唔好打針住。
但係東涌呢個診所係無X-Ray架，佢叫我帶阿斗入去愉景灣照，quote左個價俾我，照頭一張六百蚊，打後每張二百。
係呢個情況，既然都係要出去睇，咁我梗係去返Dr.Tint啦。個心一直好緊張，好驚阿斗真係甩左骹，於是打電話果陣講到亂哂龍。最後好彩，3點半有位可以攝，話睇Nina。因為男人唔得閒車我出去，我唯有將阿斗走私上巴士，希望佢靜靜地咁捱到出何文田啦。
阿斗真係出奇地乖仔，完全唔郁，仲一粒聲都未喵過。咁耐以黎，我都未試過偷雞坐巴士架，好彩阿斗唔出聲咋！
去到梳椏道，等左半個鐘，終於見醫生。比起東涌個Dr.Kylie，Dr. Tint真係用心好多。Dr. Kylie 話阿斗應該係left hip 有 dislocation，但係Dr. Tint 放左阿斗落地，睇左好幾分鐘，然後話：應該係Front leg 而唔係Hip位。
之後Dr. Tint 話，其實照X-Ray先睇到佢有冇骨裂，同埋阿斗有少少燒，有機會係骨裂而引起感染，不過亦都好可能只係緊張而過熱。所以佢都話，如果唔想佢全身麻醉，可以唔照X-Ray，帶佢返屋企由佢休息一下，再觀察一下有冇事。
本來我都唔想俾阿斗全身麻醉，只係我覺得反正出左黎，梗係照埋佢啦。就係咁，我同阿媽就放低左阿斗係診所，然後由何文田行左去旺角。
我地去到旺角行人專用區，見到有一班人望向同一個方向，而且有好多途人都好驚慌咁。聽講好似又有人倒腐蝕性液體落街，然後就有好多消防車同警車，係彌敦道響警號。之後我地兜左去廣華醫院，已經有好多記者等緊，我諗都應該幾大件事。之後上Wap Site睇即時新聞，先知原來有成40人被灼傷！好彩我地遲一步行到去，如果唔係真係有機會中招！
冇幾耐接到診所電話，話可以接返阿斗。我地去到診所，阿斗應該仲未醒得哂，仲係朦豬朦豬咁，訓得好甜。今日診所真係非常多人，聽講有一隻小狗係診所搶救緊，得番Dr.Tint一個睇症，6點半收工時間，診所仲係堆滿人。
我地由5:15一直等到7點，Dr.Tint先有時間同我地講返阿斗個X-Ray result。佢話照完出黎，見到阿斗全身都冇骨折或者骨裂，而佢其實唔止係四肢唔舒服，幾乎你摸佢全身，佢都會好唔鍾意。醫生話，呢個情況，應該係因為阿斗本身係街貓，食得唔好，所以營養唔夠，令佢身體骨骼發展得唔健全，有軟骨嘅情況。醫生叫左我去睇 X-Ray，果一刻我竟然係笑左出黎！
因為X-Ray 下的阿斗，真係好似一隻恐龍！有一張Side，有一張係全身，睇到阿斗D骨同內臟，個感覺真係好神奇。原來我隻貓仔入面係咁架…醫生話，健康的貓照出黎的骨會係白色，但係阿斗的骨頭係X-Ray下係半透明，同埋比較薄，明顯係因為缺乏鈣質。最後醫生只係開左止痛藥俾我，同埋叫我去PET SHOP 配一支鈣水俾阿斗。
就係咁，我呢一日就洗左二千蚊係阿斗身上。阿斗阿斗，你真係一隻倒米壽星黎架！
係返屋企的巴士途中，我望向旺角道的人群，竟然見到Rick Chin呀！之前睇雜誌都知佢住係旺角，佢仲話旺角係一個好amazing 0既地方。哈，我覺得係旺角見到佢，真係有點Amazing！
