琴晚有幸入場睇環球呢場曬冷騷，上至陳阿臣、謝KAY、生完仔的Kelly、校長、克勤、SWING、Prudence，下至二打六到差D都唔記得左佢0既陳思慧，同埋超級波羅雞麥家瑜(其實呢，佢唱歌真心好，但係不論講野同做人都有欠大將之風，尤其佢果種波羅雞搏上報的宣傳手段，本人實不敢恭維囉)，仲有果5個擺明搞爛gag 的Mr.成員。丫，係仲有唔講都唔知佢係環球歌手之一的鄧健泓， 同埋之前講到好似要退出但忽然個鼻又冇事0既孫耀威。

以呢個陣容黎計，個Show應該好好睇，啦？可能係我冇一早收下風啦，滿心歡喜以為係一場傾巢而出0既大騷，但原來成件事係為香港思覺失調學會，再夾TVB production，又搵埋SE做title sponsor去搞0既大龍鳳。係大家聽歌聽得慶喜時，中間仲穿插左丘凱敏講0既似鬼故多過似思覺失調的感人至深小故事，仲有谷祖琳真心分享佢細佬因為思覺失調而離世後0既感受。

其實個Message我覺得好有意義，但個presentation真係嚇死人。完完全全真係TVB製作囉，run down完全冇logic，明顯無精心安排過，純粹係歌同歌夾硬插一D懶曉以大義的小故事。然後又配搭一班歌手亂蹹廿四的古怪「保衛xx」宣言，成件事變得支離破碎，真係睇完個人會思覺失調囉！最最最最後，佢地成班環球歌手仲唱左成咩野地球唔知咩野歌，校長仲話「我地要保衛呢個地球！大家要環保！」哦！原來到最尾仲有環保呢個議題，哎呀，早知叫果班反高鐵的朋友仔，去呢個show度嗌下啦！其實我都真心想聽到謝KAY係台上面，講保衛回憶呢個反正都係硬TAG的issue時，講返兩句話，educate 下大眾，motivate大家去保衛菜園村，反高鐵。不過冇囉。

仲有最最最最gag係，中間MR. 加 Keeva成班，拎住左Sony Ericsson部Satio同AINO出黎，然後話：「等我用呢部新出0既SE SATIO 影低你地，再放上環球唱片0既FACEBOOK先！」頂丫，擺明抄NOKIA N85同N96 胡慧沖 D 對白！呢節真心覺得CHEAP晒，雖然明白總要俾返d位 阿TITLE SPONSOR賣下廣告…